La Primer Xunta Nacional de Gobiernu de Chile, oficialmente llamada Xunta Provisional Gubernativa del Reinu, ye'l nome col que se conoz al cuerpu colexáu formáu de manera revolucionaria p'alministrar la Capitanía Xeneral de Chile y tomar midíes pa la so propia defensa tres la captura del rei Fernandu VII d'España por Napoleón Bonaparte —les provincies d'España formaron la Xunta Suprema Central en dichu periodu, procedimientu que foi asonsañáu por delles colonies americanes del Imperiu español—. Constituyóse la xunta del cabildru abiertu nel edificiu del Real Tribunal del Consuláu de Santiago el martes 18 de setiembre de 1810, y funcionó hasta'l xueves 4 de xunetu de 1811.
Esta institución foi la primer forma autónoma de gobiernu surdida en Chile central, siquier dende la so conquista per parte de los españoles. Como institución, per primer vegada dexó'l protagonismu de l'aristocracia criolla na vida pública, moviendo a los funcionarios orixinarios de la metrópolis. Anque la xunta alzóse nominalmente como forma de defensa de la Monarquía Española, les idees autonomistes yá fixeren ecu na aristocracia chilena y foi aprovechada polos sos partidarios pa empecipiar una dómina de reformes que gatilló finalmente'l proceso independentista chilenu, que remató cola xura de la independencia de Chile, el 12 de febreru de 1818, y el trunfu na batalla de Maipú, el 5 d'abril del mesmu añu.
En Chile celébrense añalmente les Fiestes Patries el 18 de setiembre (xunto col día 19 siguiente, llamáu «Día de les Glories del Exércitu») pa conmemorar l'aniversariu de la Primer Xunta de Gobiernu, el primer pasu pa la formación de la nación independiente.